नव्या जिल्हाधिकार्‍यांचा पहिला दिवस
कोरोनाच्या परिस्थितीत अत्यंत साधेपणाने अन स्वागत समारंभ टाळून पहिल्या मिनिटापासून कामाला सुरुवात करणार्‍या नव्या जिल्हाधिकार्‍यांना पहिल्या बारा तासातच थेट मुख्यमंत्र्यांना ब्रिफिंग करावे लागले. एखाद्या आयएएस अधिकार्‍याबाबत घडलेला हा दुर्मिळ प्रसंग म्हणावा लागेल. असाच योगायोग नवे जिल्हाधिकारी सुनील चव्हाण यांच्या वाट्याला आला. अवघ्या तासाभराच्या आढावा बैठकीनंतर त्यांना थेट मुख्यमंत्र्यांच्या व्हीसीला सामोरे जावे लागले आहे.
नियुक्तीच्या प्रतीक्षेत असलेले महावितरणचे सहाय्यक संचालक सुनील चव्हाण काल वृक्षारोपण करून कार्यालयात निवांत बसले होते. तेवढ्यात दुपारी दीडच्या सुमारास नियुक्तीचे आदेश धडकले. कोरोना च्या पार्श्वभूमीवर तातडीने चार्ज स्वीकारण्याचे आदेश देण्यात आल्याने लगोलग साडेतीनच्या सुमारास त्यांनी पदभार स्वीकारला. एव्हाना नव्या नियुक्तीची खबर सर्व विभागांना लागली होती. सायंकाळी पाचच्या सुमारास काही प्रमुख अधिकार्‍यांसोबत बैठक घेत नव्या जिल्हाधिकार्‍यांनी कोरोना स्थितीचा आढावा घेतला. अधिकार्‍यांचे मनोबल वाढवत नव्या उमेदीने संकटाचा सामना करण्याचे आश्वासन सर्वांना दिले.
सकाळी 9:45 ला कार्यालयात हजर
गेल्या आठ दिवसांपासून नव्या जिल्हाधिकार्‍यांच्या प्रतीक्षेत असलेले जिल्हाधिकारी कार्यालय आज कमालीचे सतर्क दिसले. वरिष्ठ अधिकार्‍यांना निरोप गेल्याने बहुतेक सर्व अधिकारी साडेनऊच्या सुमारास कार्यालयात हजर झाले होते. तर स्वतः जिल्हाधिकारी सुनील चव्हाण नऊ वाजून पंचेचाळीस मिनिटाच्या ठोक्याला दालनात हजर झाले. काल एका तासांच्या बैठकीनंतर आज सकाळी पुन्हा सव्वादहाच्या सुमारास बैठकांचा सिलसिला सुरू झाला. शहरासह ग्रामीण भागातील संसर्गाची परिस्थिती, आकडेवारी जिल्हाधिकार्‍यांनी जाणून घेतली.
अवघ्या बारा तासात मुख्यमंत्र्यांशी सामना
जिल्हाधिकारी पदाची सूत्रे स्वीकारल्यानंतर सुनील चव्हाण यांना क्षणाचीही उसंत मिळाली नाही. काल तासाभराच्या बैठकीनंतर रात्री उशिरा मुख्यमंत्री कार्यालयाचा निरोप धडकला. त्यानुसार आज दुपारी साडेबाराच्या सुमारास मुख्यमंत्री व्हिडिओ कॉन्फरन्सिंगवर बोलणार असल्याचे आदेश प्राप्त झाले. त्यानुसार तातडीने सर्व विभाग प्रमुखांना सकाळी 10 लाच बैठकीचे आदेश देण्यात आले. सकाळी दोन तास आढावा बैठकीनंतर जिल्हाधिकारी चव्हाण यांनी मुख्यमंत्र्यांना ब्रिफिंग करण्याची तयारी केली. पदभार स्वीकारताच पहिल्या बारा तासात थेट मुख्यमंत्र्यांना माहिती देण्याचे खडतर आव्हान नव्या जिल्हाधिकार्‍यांना पेलावे लागले, यात शंका नाही.
